Mittwoch 6. bis Sonntag 10. August 2008
Mein Reisetagebuch habe nicht ich geschrieben, Bruno hat es uns gedichtet, so schön mit Wort und Bild – im Berner-Dialekt.
Versteckti Tessiner Perle
E Rückblick i Värsform vom Bruno Wälti
Dr Roger als Wanderleiter, ds Heidi u dr Laurent,
d’ Elisabeth u Theres, Veruschka u ds Heidi, u dr Bruno
hei sich in Brione paese troffe
u si anschliessend dürs Val Osura gloffe.
Gar mängs hei mir am Wäg bestuunet
o Heubeeri u Himbeeri u d’Schwümm hei üs versuumet.
Smaragdeni „Gumpe“ i dr Osura hei iglade
zu Pousene zum Zmittag u zum Bade.
Gägen Abe hei mir Capanna Osola, das schnusige Hüttli erreicht
wo üs dr Roger es mundigs Apero het greicht.
Druf abe het dr Roger üs g’kochet es feins Risotto,
als Abschluss hets no gäh e feini Greme u ne Espresso.
Am angere Morge es rychhaltigs Früehstück vor der Hütte
besser als i mängem Hotel du chasch bitte.
E wunderschöne Tag het si Afang gno
u het es paar schöni Perle übercho.
Steil zur Btta. Canova si mer gloffe
dr Schweiss isch nis nume so abegloffe.
Es schöns Mittagsplätzli mit grandioser Ussicht hei mir hie gha
u hei nahär dr Abstieg zu de See vor Alpe Spluga gno.
Ds Donnere het üsi Froue vom Bade du vertriibe
u mir si schnäll du zur Alpe Spluga abgstiege.
D’ Alpe Spluga, mit siine zwölf Hüttli e wunderschöne Ort
du fühlschti im Paradies bim Wort.
D’ Perle si glänze bim Abstieg am dritte Tag
bi dere prächtige Ussicht übere Grat.
Stotzig bi de Monti vo Costa u Arnau isch der Wäg
aber nach eme Bad im Wasserfall ds’ Giumaglio bisch wieder zwäg.
D’ Perlechötti wird am vierte Tag geng wie lenger,
o we dr Ufstieg vo Someo zur Alzasca wird wieder strenger.
Zu de Monti Corte u Rotonda geits mänge Tritt
doch wölls im Wald isch merksches nit.
Schöni Bildstöck u luftegi Usblicke gits z’bestuune
u haltet üs bi beschter Luune.
Uf eme schöne Monti e Mittagspouse
u chli später lat üs dr Roger vom ene Steipilz schnouse.
Du chunsch us em Wald, es wird langsam heiss,
so das fescht rinnt dr Schweiss.
Bald isch Capanna Alzasca erreicht
dert wird e chüele Trunk us em Brunnetrog greicht.
So bisch gli wieder fit
u geisch no zum See, s’isch nümme wyt.
Dr Lago Alzasca sicher di schönschti Perle vo all dene Tage
am angere Morge muesch em de Ade sage.
Am letschte Tag nomal der Ufstieg zum See
u nähär tuet dr Abschied weh.
No einisch chli obsi zur Btta. Di Doja u dr Rückblick zur Alzasca
de geits nume no nidsig ganz lang zur V. della Camanna.
No einisch e Pouse un es Bad im Bach churz vor Vergeletto
u de geits abe u füre i ds Dorf zum ene chüele Gazosa.
No chli ploudere u Adrässe ustusche u warte uf e Buss
ystige, abfahre u de isch leider Schluss.
Ds Wätter het alli Tag mitgmacht
u d’Sunne het üs viel glacht.
Roger härzleche Dank für die schöne Tage
mir tües es anders Mal sicher wieder waage.
O Zämesetzig vor Gruppe isch super gse
Was wosch no meh.
Es gibt dazu keine andere Worte mehr…Ihr darft natürlich schon Kommentare hinterlassen oder eigene Bilder heraufladen…
Hier noch andere Bilder des Trekking.